کراچی( اسٹاف رپورٹر )کلری پولیس نے رینجرز اہلکار کو شہید کرنے والے لیاری گینگ وار کے کمانڈر کو گرفتار کر لیا۔پولیس کے مطابق ملزم ماجد عرف لنگڑا کا تعلق لیاری گینگ وار جھینگو گروپ سے ہے اور ملزم جھینگو گروپ کا اہم کمانڈر ہے۔ملزم سے 1 پستول بمعہ راؤنڈز برآمد ہوا ہے۔پولیس نے بتایا کہ ملزم رینجرز اہلکار کے قتل میں ملوث رہا ہے۔ ملزم اور اس کے دیگر ساتھیوں نے 13 مارچ 2018 کو بغدادی کے علاقے میں فواد حسین نامی رینجرز اہلکار کو شہید کیا تھا۔ اسی دوران ملزم کے 3 ساتھی بھی ہلاک ہوئے تھے اور ایک زخمی حالت میں گرفتار ہوا تھا جس کا مقدمہ الزام نمبر 68/2018 بجرم دفعہ 302/353/324/34۔ اور R/W 7ATA تھانہ بغدادی میں درج ہے۔ملزم قتل،اقدام قتل، پولیس مقابلے، دھماکہ خیز مواد اور غیر قانونی اسلحہ کی سپلائی میں ملوث رہا ہے۔ ملزم اس سے قبل 10 سے زائد مقدمات میں گرفتار ہوکر جیل جا چکا ہے اور اس کے خلاف مختلف تھانوں میں دس مقدمات درج ہیں۔ملزم کو مزید قانونی کاروائی کیلئے انویسٹی گیشن حکام کے حوالے کر دیا گیا ہے۔
