گلستان جوہر میں رہائشی فلیٹ سے  ہندو نژاد سول انجنئیر کی گلا کٹی لاش ملی، قتل کے شبہ میں اہلیہ کو شامل تفتیش کر لیا

گلستان جوہر میں رہائشی فلیٹ سے  ہندو نژاد سول انجنئیر کی گلا کٹی لاش ملی، پولیس نے قتل کے شبہ میں مقتول کی اہلیہ کو شامل تفتیش کر لیا۔تفصیلات کے مطابق شاہراہ  فیصل کے علاقے گلستان جوہر بلاک 19 امام بارگاہ والی گلی میں لاکھانی اپارٹمنٹ سے متصل رہائشی اپارٹمنٹ کے فلیٹ میں تیز دھار آلے کے وار سے ایک شخص جاں بحق ہوگیا۔جس کی لاش پولیس نے اسپتال پہنچائی جہاں مقتول کی شناخت 35 سالہ راہول کمار ولد راج کمار کے نام سے کی گئی ، مقتول سول انجینئر تھا اور کنٹریکٹ پر کام کرتا تھا ، آبائی تعلق اندرون سندھ شکار پور سے تھا۔پولیس کے مطابق مقتول راہول کمار کو نامعلوم ملزمان نے گلہ کاٹ کربے دردی سے قتل کیا۔ مقتول کی اہلیہ نے واردات کے تین سے چار گھنٹے بعد پولیس کو اطلاع دی۔اہلیہ نے اپنے بیان میں بتایا کہ کوئی شخص ان کے گھر میں داخل ہوا جو ماسک لگایا ہوا تھا اس نے چھری سے راہول کا گلہ کاٹ دیا۔ پولیس نے مقتول کی اہلیہ کو شک بنیاد پر شامل تفتیش کر لیا تاہم کسی کو فوری طور پر گرفتار نہیں کیا جبکہ رہائشی عمارت میں لگے سی سی ٹی وی کیمروں کی فوٹیج بھی حاصل کر لی۔پولیس کے مطابق فوٹیج میں ماسک لگائے شخص کو آتے اور جاتے ہوئے دیکھا جا سکتا ہے تاہم تحقیقات کے بعد حقائق سامنے آئیں گے۔علاقہ مکینوں نے پولیس کو اپنے بیان میں بتایا ہے کہ مقتول اور اس کی اہلیہ کو اس فلیٹ میں شفٹ ہوئے ایک ماہ ہی ہوا تھا۔ اس لیے ان کے بارے میں کسی کو زیادہ معلومات نہیں تھیں ، مقتول کی کوئی اولاد نہیں تھی ، شادی کو بھی زیادہ عرصہ نہیں ہوا تھا ۔