کراچی:اے این ایف نے مختلف کارروائیوں میں 5 ملزمان کو گرفتار کر کے 39 لاکھ روپے سے زائد مالیت کی منشیات برآمد کر لی۔اینٹی نارکوٹکس فورس کے مطابق کراچی میں کوریئر آفس کے ذریعے آسٹریلیا بھیجے جانے والے پارسل سے جینز میں مہارت سے چھپائی گئی 135 گرام آئس برآمد کر لی گئی۔نیشنل ہائی وے حیدر آباد کے قریب ٹینکر سے 19.2 کلو گرام چرس برآمد کر کے ملزم کو گرفتار کر لیا گیا۔پشاور انٹرنیشنل ایئرپورٹ پر دوحہ جانے والے مسافر کے پیٹ سے آئس بھرے 78 عدد کیپسولز برآمد کیے گئے۔چناب ٹول پلازہ جی ٹی روڈ گجرات کے قریب ملزم کے شولڈر بیگ میں چھپائی گئی 1.5 کلو ہیروئین، 650 گرام آئس اور 200 گرام مشکوک پاوڈر برآمد کیا گیا۔جناح بس ٹرمینل ٹھوکر نیاز بیگ لاہور کے قریب ملزم کے قبضے سے 1.655 کلو گرام آئس برآمد کی گئی۔مانسہرہ میں پنجاب چوک کے قریب ملزم کے قبضے سے 100 گرام چرس اور 10 نشہ آور گولیاں برآمد کی گئیں۔گرفتار ملزم نے تعلیمی اداروں کے طلباء کو منشیات فروخت کرنے کا اعتراف کیا ہے۔گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
