رینجرز نے کاروائی کرتے ہوئے اغوا برائے تاوان کے دو ملزمان کو گرفتار کر لیا اور مغوی کی لاش برامد کر لی

پاکستان رینجرز (سندھ)اوراینٹی وائیلنٹ کرائم سیل نے انٹیلی جنس معلومات کی بنیاد پر مشترکہ کاروائی کرتے ہوئے کراچی ڈسٹرکٹ ویسٹ کے علاقے گلشن نور سرجانی ٹاؤن سے اغواء برائے تاوان میں ملوث 2 ملزمان وسیم رضااور نکس کو گرفتار کر کے مغوی خاتون کی نعش برآمد کر لی جسے ملزمان نے تاوان کی غرض سے اغواء کرنے کے بعد بے دردی سے قتل کر دیا تھا۔

 تفصیلات کے مطابق پاکستان رینجرز (سندھ) کو اطلاع موصول ہوئی کہ چند اغواء کاروں نے ایک سحر فاطمہ نامی خاتون کو کراچی کے علاقے گلبرگ ٹاؤن سے اغواء کرکے ایک کروڑ روپے تاوان طلب کر رہے ہیں۔ جس پر پاکستان رینجرز (سندھ) اور اینٹی وائیلنٹ کرائم سیل نے خفیہ معلومات کی بنیاد پر مشترکہ کارروائی کرتے ہوئے اغواء کاری میں ملوث 2 ملزمان وسیم رضااور نکس کو گلشن نور سرجانی ٹاؤن سے گرفتار کر لیا۔

 ابتدائی تفتیش کے دوران ملزمان نے انکشاف کیا ہے کہ 15 فروری 2025 کوملزمان نے سحر فاطمہ نامی خاتون کو تاوان کی غرض سے اغواء کر کے حسن بروہی گوٹھ سرجانی ٹاؤن میں ایک کرائے کے مکان میں رکھا اور مغوی خاتون کے ہاتھ پاؤں باندھ کرویڈیو بنا کر مغویہ کے والد کو بھجوائی اور ایک کروڑ روپے تاوان طلب کیا۔ تاوان نہ ملنے کی صورت میں ملزمان نے مغوی خاتون کو بے دردی سے قتل کر دیا۔ ملزمان کی نشاندہی پر مغویہ خاتون کی لاش حسن بروہی گوٹھ میں واقع ایک گھر سے برآمد کر لی۔ نعش کو پوسٹ مارٹم کے لیے عباسی شہید ہسپتال منتقل کر دیا گیا ہے۔واقعہ کی ایف آئی آر تھانہ یوسف پلازہ ڈسٹرکٹ سینٹرل میں درج ہے۔

    گرفتارملزمان کو مزید قانونی کاروائی کے لیے اینٹی وائیلنٹ کرائم سیل کے حوالے کر دیا گیا ہے۔