کراچی( )نیو کراچی میں شہریوں نے لوٹ مار کرنے والے ڈاکو کو تشدد کرنے کے بعد آگ لگا کر ہلاک کر دیا،مبینہ پولیس مقابلوں میں دو ڈاکوؤں کو زخمی حالت میں گرفتار کر لیا گیا۔تفصیلات کے مطابق نیو کراچی صنعتی ایریا تھانے کی حدود سیکٹر الیون جی بسم اللہ ہوٹل کے قریب واقع ہول سیل کنفکشنری کی دکان میں لوٹ مار کے لیے آنے والے ایک ڈاکو کو شہریوں نے پکڑ کر تشدد کا نشانہ بنایا اور پھر آگ لگادی جس کے باعث وہ ہلاک ہو گیا،ڈاکوئوں کی فائرنگ سے دو بھائی زخمی ہو گئے۔زخمی ہونے والے دونوں افراد اور ہلاک ڈکیت کی لاش کو عباسی شہید اسپتال منتقل کیا گیا جہاں زخمی افراد کی شناخت 38 سالہ محمد فیصل اور 35 سالہ محمد فیضان ولد محمد فیروز کے نام سے ہوئی۔زخمی ہونے والے دونوں افراد آپس میں بھائی اور دکان کے مالک ہیں۔پولیس کے مطابق ہلاک ہونے والے ڈکیت کی فوری طور پر شناخت نہیں ہو سکی ہے۔پولیس نے بتایا کہ کنفکشنری اسٹور کی سپلائی کی سوزوکی جو سامان لیکر دکان میں آ رہی تھی کو موٹر سائیکل سوار دو ڈاکوؤں نے روکنے کی کوشش کی تاہم ڈرائیور سوزوکی وہاں سے بھگاتے ہوئے اسٹور تک لے آیا۔ڈرائیور سوزوکی سے اتر کر اسٹور میں گیا تو ڈاکو بھی پیچھے سے اسٹور میں داخل ہو گئے۔اندر اسٹور کے مالک دونوں بھائی موجود تھے جنہوں نے مزاحمت کی جس پر ملزمان کی فائرنگ سے دونوں بھائی ٹانگ میں گولیاں لگنے سے زخمی ہو گئے۔ڈاکو باہر نکلے تو شہریوں نے ایک ڈاکو کو پکڑ کر اس پر تشدد کیا ،پولیس نے بتایا کہ تشدد سے ہی ڈاکو کی موت واقع ہو چکی تھی تاہم بعد ازاں شہریوں نے اسے آگ بھی لگائی جس سے اس کے کپڑے جل گئے۔ہلاک ڈاکو کے قبضے سے ایک پستول برآمد کیا گیا ہے اور اس کی شناخت کی کوشش کی جا رہی ہے۔بغدادی پولیس نے لیاری دبئی چوک کے قریب مبینہ مقابلے میں ایک ملزم کو زخمی حالت میں گرفتار کر لیا جبکہ ملزم کا ساتھی فرار ہو گیا۔گرفتار ملزم کی شناخت وحید کے نام سے ہوئی۔ملزم سے ایک پستول بمعہ راؤنڈز اور موٹر سائیکل برآمد کی گئی ہے۔زخمی ملزم کو سول اسپتال منتقل کر دیا گیا ہے جبکہ ملزم کا سابقہ کریمنل ریکارڈ معلوم کیا جا رہا ہے۔سہراب گوٹھ پولیس نے الآصف اسکوائر کے عقب میں انڈس گرائونڈ کے قریب مبینہ مقابلے میں ایک ملزم نصیر ولد نادر شاہ کو زخمی حالت میں گرفتار کر لیا جبکہ اس کا ساتھی فرار ہونے میں کامیاب ہو گیا ۔زخمی ملزم کے قبضے سے پستول اور نقد رقم برآمد کی گئی ہے۔
