کراچی ():
ڈسٹرکٹ ایسٹ پولیس نے سچل تھانے کی حدود میں کارروائی کرتے ہوئے ڈکیتی کی وارداتوں میں ملوث نو عمر ڈکیت گروہ کو سرغنہ سمیت گرفتار کر لیا۔ پولیس کے مطابق گروہ کا سرغنہ کم عمر بچوں کو چرس اور آئس کا عادی بنا کر ان سے وارداتیں کرواتا تھا۔
خفیہ اطلاع پر پولیس نے غازی گوٹھ اسکیم 33 کے قریب کارروائی کر کے چار ملزمان کو گرفتار کیا۔ گرفتار ملزمان کے قبضے سے ایک پستول بمعہ ایمونیشن، اعلیٰ کوالٹی کی چرس، موبائل فونز اور نقدی برآمد کی گئی، جبکہ ملزمان کے زیر استعمال بلا نمبری موٹر سائیکل کو بھی قبضے میں لے لیا گیا ہے۔
گرفتار ملزمان کی شناخت رضوان ولد رمضان، اظہار ولد ذوالفقار، یاسین ولد محمد حاشم اور غلام محمد ولد مدد علی کے ناموں سے ہوئی ہے۔ پولیس کے مطابق ملزمان نے دوران تفتیش غازی گوٹھ، سکندر گوٹھ اور اطراف کے علاقوں میں متعدد وارداتوں کا اعتراف کیا، جن کی تفصیلات حاصل کی جا رہی ہیں۔
