کراچی (اسٹاف رپورٹر) کاؤنٹر ٹیررازم ڈپارٹمنٹ (سی ٹی ڈی) اور حساس اداروں نے انٹیلیجنس بیسڈ آپریشن کے دوران کراچی سے 4 خطرناک دہشت گردوں کو گرفتار کرلیا۔ سی ٹی ڈی ترجمان کے مطابق کارروائی 29 جولائی 2025 کو اس وقت کی گئی جب ملزمان ٹرین کے ذریعے فرار ہونے کی کوشش کر رہے تھے۔
گرفتار دہشت گردوں میں محمد سجاد عرف شاوو، عبید علی عرف عبیدی، محمد عمیر اصغر اور شکیل احمد شامل ہیں۔ ترجمان کے مطابق ملزمان 18 مئی 2025 کو ضلع بدین میں ہونے والے قتل میں ملوث ہیں، جس کا مقدمہ تھانہ بدین میں نمبر 117/2025 کے تحت درج تھا۔
سی ٹی ڈی کے مطابق ملزمان سے واردات میں استعمال ہونے والا اسلحہ برآمد کر لیا گیا ہے، جسے فرانزک کے لیے بھیج دیا گیا۔ مزید بتایا گیا کہ ملزمان واردات سے قبل حیدرآباد میں قیام پذیر رہے اور مکمل ریکی کی۔ تفتیش کے دوران قتل کی واردات میں کالعدم علیحدگی پسند تنظیم کے ملوث ہونے کے شواہد بھی ملے ہیں۔
گرفتار دہشت گرد متعدد سنگین مقدمات میں مطلوب تھے اور کالعدم دہشت گرد تنظیم سے وابستہ ہیں۔ سی ٹی ڈی حکام کا کہنا ہے کہ یہ کامیابی تکنیکی شواہد اور انٹیلیجنس پر مبنی کارروائی کے نتیجے میں ممکن ہوئی۔
آئی جی سندھ نے سی ٹی ڈی کی کارروائی کرنے والی ٹیم کے لیے انعام اور تعریفی اسناد کا اعلان کیا ہے۔ مزید تفتیش جاری ہے اور اہم انکشافات متوقع ہیں۔
