کراچی: پٹاخوں کے گودام میں دھماکہ، بی ڈی یو کی رپورٹ تیار
کراچی میں پٹاخوں کے گودام میں ہونے والے دھماکے کی بم ڈسپوزل یونٹ نے رپورٹ تیار کرلی۔ رپورٹ کے مطابق واقعے میں 500 کلوگرام فائر ورکس کا سامان جل گیا جبکہ دھماکے کی آواز 5 سے 7 کلومیٹر دور تک سنی گئی۔
رپورٹ میں بتایا گیا ہے کہ دھماکے کے نتیجے میں 100 میٹر کے دائرے میں تباہی پھیلی۔ عمارت کے اندر موجود 3 گوداموں میں اب بھی آتش بازی کا سامان رکھا ہوا ہے جبکہ قریبی گراؤنڈ میں 2 کنٹینروں میں بھی آتش بازی کا سامان موجود ہے۔
بم ڈسپوزل یونٹ کے مطابق اس وقت مجموعی طور پر 5 ہزار کلوگرام سامان موقع پر موجود ہے۔ رپورٹ میں انکشاف کیا گیا ہے کہ ملزم حنیف مختلف شہروں اور بیرون ملک سے بھی سامان منگواتا تھا اور اسی عمارت کے عقب میں آتش بازی کا سامان تیار بھی کرتا تھا۔
رپورٹ میں سفارش کی گئی ہے کہ تمام تر سامان کو کسی محفوظ مقام پر منتقل کر کے جلد از جلد تلف کیا جائے۔
