کورنگی مدینہ کالونی کا رہائشی نوجوان جہانزیب شادی کے روز لاپتہ ہوگیا۔ پولیس کے مطابق مبینہ طور پر اغوا کا مقدمہ تھانہ زمان ٹاؤن میں دولہے کے والد وسیم کی مدعیت میں درج کرلیا گیا ہے۔
درخواست گزار نے بتایا کہ 11 ستمبر کو جہانزیب کی بارات جانی تھی۔ شام چھ بجے وہ دلہا بننے کی تیاری کے لیے موٹر سائیکل پر سیلون گیا، تاہم اس کے بعد واپس نہ آیا۔ جہانزیب اپنے موبائل فون بھی شام پانچ بجے گھر پر چھوڑ کر گیا تھا۔
مدعی نے بتایا کہ سیلون سے دوسرے بیٹے کو ساڑھے سات بجے فون آیا اور بتایا گیا کہ جہانزیب سیلون پہنچا ہی نہیں۔ والد کا دعویٰ ہے کہ نامعلوم افراد نے اس کے بیٹے کو اغوا کرلیا ہے۔
اہل خانہ کے مطابق جہانزیب ایک نجی فیکٹری میں ملازمت کرتا ہے۔ پولیس نے مقدمہ درج کرلیا ہے اور مغوی دولہے کی تلاش جاری ہے۔
—
