کراچی: برطانیہ سے چوری شدہ مہنگی ترین رینج روور کراچی میں موجود ہونے کا انکشاف
برطانیہ سے چوری ہونے والی مہنگی ترین رینج روور گاڑی کے کراچی پہنچنے کا انکشاف ہوا ہے۔ یو کے پولیس کی درخواست پر انٹرپول مانچسٹر نے سندھ پولیس کو گاڑی کی برآمدگی میں مدد کے لیے باضابطہ خط لکھ دیا ہے۔
تفصیلات کے مطابق سیاہ رنگ کی رینج روور 22 نومبر 2022 کو ہیروگیٹ سے چوری کی گئی تھی۔ گاڑی میں لگے ٹریکر کا رابطہ لیڈز میں منقطع ہوا تھا تاہم اس کی تازہ ترین لوکیشن 11 فروری 2025 کو کراچی کے علاقے صدر، کورنگی روڈ اور اعظم بستی کے قریب آئی تھی۔
انٹرپول کی جانب سے سندھ پولیس کو فراہم کردہ خط میں کہا گیا ہے کہ چوری شدہ گاڑی کی مکمل تفصیلات انٹرپول کے ایس ایم وی ڈیٹا بیس میں موجود ہیں اور پاکستان پولیس برآمدگی کے عمل میں یو کے پولیس کی مدد کرے۔
ذرائع کے مطابق سندھ پولیس نے خط موصول ہونے کے بعد کراچی میں رینج روور کی تلاش شروع کر دی ہے۔
