ایف آئی اے نے شہری پر تشدد، اغوا اور انسانی اسمگلنگ میں ملوث 2 ملزمان کو گرفتار کر لیا

کراچی(  )ایف آئی اے نے شہری پر تشدد، اغوا اور انسانی اسمگلنگ میں ملوث 2 ملزمان کو گرفتار کر لیا۔ایف آئی اے انسداد انسانی اسمگلنگ سرکل کے مطابق چھاپہ مار کاروائیوں میں 2 انسانی اسمگلرز شاہد ندیم اور محمد کاشف کو گرفتار کیا گیا۔ملزمان کو کراچی کے مختلف علاقوں سے گرفتار کیا گیا ہے۔حکام کے مطابق ملزمان سادہ لوح شہریوں سے ویزا فراڈ کرنے میں ملوث پائے گئے۔ملزم شاہد ندیم نے شہری کو کمبوڈیا ملازمت کا جھانسہ دے کر 7 لاکھ روپے بٹورے۔ملزم شاہد ندیم نے دیگر ساتھیوں کی ملی بھگت سے متاثرہ شخص کو 1600 امریکی ڈالر کے عوض فروخت کر دیا۔متاثرہ شخص کو بعد ازاں کمبوڈیا میں سیف ہاؤس میں رکھ کر تشدد کا نشانہ بنایا جاتا رہا۔حکام کے مطابق ملزم محمد کاشف نے 7 شہریوں کو آئرلینڈ ملازمت کا جھانسہ دے کر فی کس 10 لاکھ روپے کا معاہدہ کیا۔دبئی پہنچنے پر مسافروں نے ایجنٹ کی جانب سے دئیے گئے جعلی پاسپورٹ پر آئرلینڈ جانے کی کوشش کی جس پر مسافروں کو پاکستان ڈی پورٹ کر دیا گیا تھا۔ملزمان کو گرفتار کر کے تفتیش کا آغاز کر دیا گیا ہے۔ایف آئی اے کے مطابق دیگر ملزمان کی گرفتاری کے لئے چھاپے مارے جا رہے ہیں۔