ڈسٹرکٹ ایسٹ پولیس کی بڑی کارروائی: کروڑوں روپے مالیت کا چھینا گیا کنٹینر برآمد، مغوی بازیاب، ڈکیت گینگ کا سرغنہ گرفتار

کراچی: ڈسٹرکٹ ایسٹ پولیس نے ایک بڑی کارروائی کے دوران کروڑوں روپے مالیت کے چھینے گئے کنٹینر کو برآمد کرلیا ہے، جب کہ اغواء کیے گئے ڈرائیور اور کنڈیکٹر کو بھی بحفاظت بازیاب کرایا گیا ہے۔ اس کارروائی میں ڈکیت گینگ کے سرغنہ کو گرفتار کرلیا گیا۔

تفصیلات کے مطابق گزشتہ شب چھ مسلح ملزمان نے گلشن حدید کے علاقے سے 22 وہیلر لوڈ کنٹینر کو ڈرائیور اور کنڈیکٹر سمیت اغواء کرلیا تھا، جس کا مقدمہ تھانہ اسٹیل ٹاؤن میں درج کیا گیا تھا۔

پولیس کے مطابق خفیہ اطلاع پر تھانہ سائٹ سپر ہائی وے کے انچارج نیو سبزی منڈی چوکی نے نادرن بائی پاس کے قریب کارروائی کرتے ہوئے واردات کے ماسٹر مائنڈ، سلیم ولد رئیس خان کو گرفتار کرلیا۔ کارروائی کے دوران مغوی ڈرائیور اور کنڈیکٹر کو بحفاظت بازیاب کرالیا گیا۔

گرفتار ملزم کے قبضے سے جدید طرز کا گلاک پسٹل بمعہ ایمونیشن اور مسروقہ کنٹینر بمعہ مکمل سامان بھی برآمد کرلیا گیا۔ پولیس کے مطابق کنٹینر میں 36 ٹن سے زائد ڈالڈا گھی/آئل موجود تھا، جس کی مالیت کروڑوں روپے میں ہے۔

پولیس نے ملزمان کے خلاف قانونی کارروائی کا آغاز کرتے ہوئے مقدمات درج کرلیے ہیں، جب کہ فرار ملزمان کی گرفتاری کے لیے چھاپہ مار کارروائیاں جاری ہیں۔