فیصل آباد میں انسداد دہشت گردی (اے ٹی سی)کی خصوصی عدالت نے 9 مئی کے مقدمات کا فیصلہ سنادیا، عدالت نے 196 ملزمان کو سزائیں سنادیں۔
عدالت نے قومی اسمبلی میں اپوزیشن لیڈر عمر ایوب، سینیٹ میں اپوزیشن لیڈر شبلی فراز، پی ٹی آئی رہنما زرتاج گل کو 10، 10 سال قید کی سزا سنادی۔
عدالت نے حساس ادارے حملہ کیس میں 185 میں سے 108 ملزمان کو سزا سنائی ہے جبکہ اس کیس میں 77 افراد کو بری کیا گیا ہے۔
رکن قومی اسمبلی ایم این اے صاحبزادہ حامد رضا کو بھی 10سال قید کی سزا سنادی گئی ہے۔
فواد چوہدری، زین قریشی اور خیال کاسترو سمیت فیض اللّٰہ کموکا، رانا اسد محمود خان، بلال اشرف بسرا، ہارون رشید، عمارہ رشید، صاحبزادہ حسن رضا اور کامران ورک کو اس مقدمے سے بری کردیا گیا ہے۔
دوسری جانب عدالت نے تھانہ غلام محمد آباد میں درج 9 مئی کے مقدمے میں 66 ملزمان میں سے 8 ملزمان کو بری کردیا گیا ہے۔
عدالت نے 58 ملزمان کو 10، 10 سال کی سزا سنائی ہے جبکہ جنید افضل ساہی کو 3 سال کی سزا سنائی گئی ہے۔
علاوہ ازیں انسدادِ دہشت گردی عدالت نے کچھ دیر بعد تھانہ سول لائن میں درج مقدمے کا بھی فیصلہ سنایا۔
اس مقدمے میں عدالت نے 32 میں سے 28 ملزمان کو سزا سنائی اور 4 کو بری کردیا۔ ان 28 ملزمان کو 10، 10سال قید کی سزا سنائی گئی ہے۔
