کراچی (اسٹاف رپورٹر) پاکستان رینجرز سندھ نے شہریوں کے اغوا میں ملوث ایک منظم گروہ کے خلاف بڑی کارروائی کرتے ہوئے 4 ملزمان کو گرفتار کرلیا جبکہ ان کے قبضے سے 15 سالہ مغوی کو بازیاب کرا لیا گیا۔
ترجمان رینجرز کے مطابق کارروائی کراچی کے علاقے نیو ایم اے جناح روڈ اسلامیہ کالج کے قریب کی گئی جہاں اغوا کار موٹرسائیکلوں اور ایک کار پر سوار تھے۔ گرفتار ملزمان کی شناخت عامر علی، بلال علی، فیصل رانا اور ملزمہ گلزارہ کے نام سے ہوئی ہے، جبکہ ان کے تین ساتھی محمد نعمان، فرید الحق اور محمد نور موقع سے فرار ہونے میں کامیاب ہوگئے۔
ترجمان نے بتایا کہ ملزمان نے کار پر پولیس وارننگ لائٹ لگائی ہوئی تھی، گاڑی کے شیشے سیاہ تھے جبکہ ملزمان کے قبضے سے غیر قانونی اسلحہ، ایمونیشن، پولیس کی وردی، ہتھکڑیاں اور ایک کار بھی برآمد ہوئی ہے۔
ابتدائی تفتیش کے مطابق گروہ کا سرغنہ محمد نعمان ہے جبکہ گرفتار ملزمہ گلزارہ اس کی قریبی ساتھی بتائی جاتی ہے جو دیگر ملزمان کی مجرمانہ سرگرمیوں میں مدد فراہم کرتی رہی ہے۔
ترجمان رینجرز نے بتایا کہ بازیاب ہونے والا مغوی 15 سالہ راشد بلیدی اندرون سندھ ضلع لاڑکانہ کا رہائشی ہے جو کراچی میں ایک پنکچر کی دکان پر کام کرتا تھا۔ یوم آزادی کے موقع پر وہ مزار قائد پر نکالی گئی ریلی کے ساتھ گیا تھا، جہاں ملزمان نے خود کو پولیس اہلکار ظاہر کرتے ہوئے اسے زبردستی گاڑی میں بٹھایا اور تشدد کا نشانہ بنایا۔
واقعے کے بعد گرفتار ملزمان کے خلاف تھانہ جمشید کوارٹرز میں تین مقدمات درج کر لیے گئے ہیں جبکہ مزید قانونی کارروائی کے لیے ملزمان کو اسلحہ سمیت پولیس کے حوالے کر دیا گیا ہے۔ رینجرز کے مطابق فرار ملزمان کی گرفتاری کے لیے چھاپے مارے جا رہے ہیں۔
