قطر کے اپنی سلامتی و خودمختاری کیلئے اقدامات کی مکمل حمایت کرتے ہیں، عرب اور اسلامی ممالک کے ہنگامی اجلاس کا اعلامیہ

قطر سے اظہار یکجہتی کیلئے عرب اور اسلامی ممالک کے ہنگامی سربراہی اجلاس کا اعلامیہ جاری کردیا گیا۔

قطرکے دارالحکومت دوحہ میں عرب اسلامی ہنگامی سربراہی اجلاس میں وزیراعظم شہباز شریف، سعودی ولی عہد محمد بن سلمان سمیت کئی ممالک کے سربراہان شریک ہوئے۔

اعلامیے میں قطر پر اسـرائیـلی جارحیت کو بزدلانہ، غیرقانونی اور امن کی راہ میں بڑی رکاوٹ قرار دیتے ہوئے سخت الفاظ میں مذمت کی گئی۔

اعلامے میں کہا گیا ہے کہ اسـرائیـل کے قطر کے رہائشی علاقے پر بزدلانہ حملے کی سخت ترین الفاظ میں مذمت کرتے ہیں، اس حملے میں وہ عمارتیں بھی شامل تھیں جو قطر نے مختلف ثالثی وفود کی میزبانی کے لیے مخصوص کی تھیں، یہ حملہ اقوام متحدہ کے رکن ایک عرب و اسـلامی ملک کے خلاف کھلی جارحیت ہے اور خطے و دنیا کے امن کے لیے خطرناک اضافہ ہے۔

اعلامیے کے مطابق قطر کے ساتھ بھرپور یکجہتی کا اظہار کرتے ہیں اور واضح کرتے ہیں کہ یہ حملہ دراصل تمام عرب و اسـلامی ممالک کے خلاف جارحیت ہے، ہم قطر کے ان تمام اقدامات کی مکمل حمایت کریں گے جو وہ اپنی سلامتی، خودمختاری اور عوام کے تحفظ کے لیے کرے گا، یہ جارحیت نہ صرف قطر کی خودمختاری پر حملہ ہے بلکہ غـزہ میں جنگ بندی اور قیدیوں کے تبادلے کی ثالثی کوششوں کو سبوتاژ کرنے کے مترادف ہے۔

عرب اسلامی ممالک نے کہا ہے کہ کسی بھی بہانے سے اسـرائیـلی جارحیت کو جائز قرار دینے کی سخت مذمت کرتے ہیں اور زور دیتے ہیں کہ یہ کھلا خلافِ قانون عمل ہے جو فلسـطیـن کے مسئلے کے پرامن حل کی کوششوں کو سبوتاژ کرتا ہے، اسـرائیـل کی جانب سے قطر یا کسی بھی عرب و اسلامی ملک کو دوبارہ نشانہ بنانے کی دھمکیوں کو اشتعال انگیزی قرار دیتے ہیں اور عالمی برادری سے مطالبہ کرتے ہیں کہ ان دھمکیوں کی مذمت کرے اور انہیں روکنے کے لیے اقدامات کرے۔

اعلامیے میں بتایا گیا ہے کہ اسـرائیـل کی جانب سے مقبوضہ فلسـطیـنی علاقوں کے کسی حصے کو ضم کرنے کی کسی بھی کوشش کو مسترد کرتے ہیں اور اسے فلسـطیـنی عوام کے قانونی و تاریخی حقوق پر کھلا حملہ قرار دیتے ہیں، عالمی برادری سے مطالبہ کرتے ہیں کہ اسـرائیـل کی مسلسل جارحیت روکے اور خطے کے ممالک کی خودمختاری اور سلامتی کا احترام یقینی بنائے۔

عرب اور اسلامی ممالک نے تمام ممالک سے اپیل کی کہ اسـرائیـل کو اس کے جرائم کی سزا دینے کے لیے قانونی اور عملی اقدامات کریں، اس پر پابندیاں لگائیں، اسلحہ کی فراہمی بند اور اس کے خلاف قانونی مقدمات چلائے جائیں۔