اینٹی نارکوٹکس فورس (اے این ایف) نے متحدہ عرب امارات میں ہیروئن اسمگل کرنے والے بین الاقوامی نیٹ ورک کو بے نقاب کر کے ایک اور بڑی کامیابی حاصل کر لی۔
ترجمان اے این ایف کے مطابق انٹیلیجنس اطلاعات پر مبنی کارروائی کے دوران نیٹ ورک کا سرغنہ ندیم خان سمیت 11 افراد کو گرفتار کر لیا گیا ہے، جن میں چار خواتین اور ایک فارماسسٹ بھی شامل ہیں۔
بین الاقوامی نیٹ ورک غریب اور کم پڑھے لکھے نوجوان جوڑوں کو سہانے مستقبل کے جھوٹے خواب دکھا کر منشیات اسمگلنگ کے لیے استعمال کرتا تھا۔ منشیات کو کیپسولز کی صورت میں نوجوانوں کے پیٹ میں چھپایا جاتا تھا تاکہ ہوائی اڈوں سے بیرون ملک اسمگل کیا جا سکے۔
ملک کے مختلف ہوائی اڈوں پر اے این ایف کی بہتر مانیٹرنگ اور جدید ڈیجیٹل نگرانی کے باعث نیٹ ورک بے نقاب ہوا۔ کارروائی کے دوران دو ہوائی اڈوں سے چار نوجوان جوڑے پیٹ میں ہیروئن سے بھرے کیپسولز سمیت گرفتار کیے گئے۔
تفتیش کے دوران مزید تین سہولت کاروں کو بھی گرفتار کیا گیا جبکہ نیٹ ورک سے وابستہ دیگر مفرور ملزمان کی نشاندہی کر لی گئی ہے۔ ترجمان کے مطابق بہت جلد تمام مفرور بھی قانون کی گرفت میں ہوں گے۔
اے این ایف کا کہنا ہے کہ محدود وسائل کے باوجود وہ منشیات کے بین الاقوامی نیٹ ورکس کے خاتمے کے لیے پرعزم ہے، اور پاکستان سے خلیجی ممالک کو منشیات اسمگلنگ روکنے کے لیے اقدامات جاری رہیں گے۔
